Natë e paharrueshme e Kadrit – Reflektim, adhurim dhe emocion

Me zemra të mbushura me devotshmëri dhe frymëzim, SH.M.I. “Medreseja Isa Beu” – Gostivar, në bashkëpunim me Myftininë e Gostivarit, organizoi një program të veçantë me rastin e Natës së Kadrit, në Xhaminë e Sahatit.

Ky tubim shpirtëror, i mbushur me lexim të Kuranit, ilahi, poezi dhe ligjërata me mesazhe prekëse, solli një atmosferë të thellë reflektimi mbi vlerën dhe begatitë e kësaj nate të shenjtë, e cila është “më e mirë se një mijë muaj” (Kur’an, 97:3).

Nxënëset e Medresesë, me përkushtim dhe emocion, përcollën mesazhe që forcuan lidhjen me besimin, lutjen dhe mirësinë, ndërsa të pranishmit përjetuan çaste përulësie dhe afrimiteti me Allahun.

Ky program ishte një dëshmi e përkushtimit dhe dashurisë për fenë tonë, duke na rikujtuar se Nata e Kadrit është një mundësi e rrallë për falje, mëshirë dhe pranimin e lutjeve.

Falënderojmë të gjithë pjesëmarrësit për përjetimin e kësaj nate të veçantë dhe lutemi që Allahu t’ju dhurojë paqe, dritë dhe begati në zemrat dhe familjet tuaja!

Për hajr ju qoft kjo natë!

Medreseja Isa Beu, paralelja - Gostivar